..

فلان معروف عنه انه انسان صالح .. ( والصالحين كثر .. بس هذا سووا له رأس وقرون ! ) فيقولوا لك لو بغيت الشيء الفلاني .. خلي فلان يدعي لك !

ولا المس جسده ولا شيء من ثيابه .. عشان البركة !

ولا اقولك احسن .. خذ صورته وعلقها في بيتكم !

لا والقهر فلان هذا مصدق نفسه !!

..

لو الجزمة ( اكرمكم الله ) مقلوبة عدلها صح .. لانها لو كانت مقلوبة يعني حد من اهلك بيموت !

..

زمان يقولوا للأطفال لا تروحوا تلعبوا بعيد ... لانه راح يجيكم رجال في ظهره حفرة يشيل الاطفال ويحطهم داخلها ويموتون !!

ومن الحرص ما قتل !!

..

الخرافات كثيرة في حياتنا ... فيه منها المعشعش في عقولنا .. وفيه منها القابل للتعديل أوالتحريف !

حتى في السياسية فيه خرافات .. وفي حياتنا اليومية .. وفي قصص الأولين والمستقبليين ! ... حتى فيه خرافة في الدين !

اممممم

زمااان قبل "مية" سنة تقريبا كأني قرأت انه كلمة " خرافة " هي في الاساس اسم لشخص غريب الاطوار والكلام !

وكان هذا خرافة يتكلم بكلام عجيب بعيد كل البعد عن الواقع !

فكانوا الناس يستغربوا من كلامه وما يفهموه !

فكانوا لما يسمعوا أي كلام بعيد عن العقل يقولوا " قول خرافة " !

نسبة لصاحبهم خرافة !

وجيل بعد جيل لما يسمعوا كلام غريب كمان يقولوا قول خرافة !

وحتى يومنا هذا ونحن نقول قول خرافة !

_ رحمك الله يا خرافة _!

مادري إذا هذا الكلام صحيح أو لا ..... الله اعلم

لما كنت طفلة كنت احسب الشخص المخرف يعني زي الخروف ما يفهم شيء !

هههههـاي

مادري يمكن نظريتي صحيحة !

 ..

المهم

في الوقت الحالي صارت الخرافات هي عمود الحياة ... والكلام كله خرافة في خرافة !

والناس تصدق .. وتستسيغها ... وعادي ماشية الحياة !

وفي المدح كمان الخرافة واصلة !

وشكل فلان خرافي !

وملابسه خرافية !

اوف وتسريحة الشعر ابو الخرافة !

يعني اناقة مستحيلة !  وااو !

..

امممم

اصل الخرافة جاية من الجهل .. والجهل انواع واشكال  .. في كل كبيرة وصغيرة في الحياة .. من ابسط حاجة وحتى اعظم حاجة في الكون ! .. وعليه قيسوا الخرافات !

لما عقل الانسان يتوقف عن التفكير .. ويصدق كلام الشخص "الفلاني او العالم او المتعلم او المثقف" الكذاب إللي يعيث في الارض الفساد ... هنا تكون الخرافة تكونت وسكنت في هذا العقل " المغلوب على امره " !

..

اغلب الاشخاص المتحكمين .. تحكموا وسيطروا على عقول الناس عن طريق هذي الخرفات !

صحيح انه المتحكم المفروض يكون متعلم يعني بعيد عن الخرافة ... لكن بذكائه الظالم وشهوة حب السيطرة تخليه يحكم رعاياه بالخرافات !

صاحب السلطة يحكم بثلاث .. اما العلم والاقناع ... طبعا مع الشدة في وقتها المناسب

واما بالحديد والنار ... وهذا ظالم متجبر

واما بالخرافات .. وهي اسهل طريقة خصوصا للشعب الجاهل !

والامثلة كثيرة في حياتنا !

... طبعا ما اقصد حكام الدول بس ! ... لكن اقصد كل شخص عنده او يملك السلطة على فئة معينة من الناس .. أيا كانت ! .. حتى لو كان رب الاسرة !

..

كنت اتوقع انه الخرافة ما يقولها إلا الجاهل !

لكن اكتشفت انه المتعلم هو إللي يبتدعها  ويدسها في عقل الجاهل !

القاعدة تقول : متعلم ظالم .. عنده حب السيطرة والفساد .. تحته او حوله ناس جهال " ما يحركوا عقولهم بس يقولوا سمعا وطاعة ! " .. راح تكون الاداة المستخدمة في تحريكهم هي الخرافة !

..

.

الخلاصة ... الجهل هو السبب في انتشار الخرافات

علينا في هالحالة ان نحيط عقولنا بهالة من العلم والمعرفة .. وننعشه بالتفكر والتأمل ...

مش أي حاجة يقولها إللي اكبر مني هي الصح !

ومش أي حاجة يقولها صاحب السلطة هي الصح !

وطبعا كمان مش أي حاجة انت تؤمن فيها هي الصح !

كل شيء يتغير ويتطور .... وبالعقل والعلم نقدر نواكب هالتطور والعلوم ... ونقدر نحكم على حياتنا بالازدهار

..

القرار قرارك يا انسان ...

تعيش بالخرافات ... او تعيش بالعلم !

تعيش بعقل غيرك ... او تعيش بعقلك !

سلامي ودعواتي

: )